„Lífið er of stutt til að eyða miklum tíma fyrir framan spegilinn“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Tískan er svo mikill tjáningarmáti. Hún endurspeglar svo mikið hvernig týpa fólk er og hvernig fólki líður. Stundum getur maður séð á fötunum á fólki hvernig tónlist það hlustar á og hvert það fer að skemmta sér. 

Ætli það sé ekki svo skemmtilegast hvað hún er margbreytileg. Það sem er flott í dag virkar ekki á morgun og öfugt sem gerir hana svo spennandi.

Hver er uppáhalds flíkin þín og af hverju?

Ég á margar uppáhaldsflíkur en nýja uppáhalds flíkin er geggjuð regnkápa sem var keypt í hönnunarbúð í London á Brick Lane. Geggjað góð kaup og nú finnst mér heldur betur rigningin góð. 

Ég held mikið upp á Aftur fötin mín sem eru úr endurunnum textíl þar sem gömul föt verða ný sem mér finnst heillandi stefna og eru alltaf flott hvernig sem árin líða. Íslensk hönnun er svo framúrskarandi! 

Geggjuð skærgula BAHNS peysan mín úr Kiosk, klikkaður silki Kauphallargalli eftir Eygló sem við hjónin fengum okkur í stíl, Harpa Einars er loksins að fara aftur á stjá og alltaf klassísk Hildur Yeoman. 

Mig langar mikið í síðkjól eftir Ýr, það er næst á dagskrá. Ég er alltaf með glingur og skartgripahönnuðir í uppáhaldi eru Kría Jewelry, Orri Finn og Hik&Rós, virkilega fallegir gripir sem setja lokapunkt á dressið.

Eyðirðu miklum tíma í að velja föt hverju sinni?

Nei, ég er ofur fljót að finna föt og hafa mig til. Svo fljót að vinir mannsins míns trúa ekki sínum eigin augum þegar þeir verða vitni að herlegheitunum, ný föt, hárgreiðsla, förðun og allt heila klabbið á mettíma. 

Lífið er of stutt til að eyða of miklum tíma fyrir framan spegilinn segi ég og kem mjög miklu í verk á hverjum degi. 

Mér finnst mjög gaman að klæða mig og hafa mig til en það þarf ekki að taka langan tíma.

Hvernig myndirðu lýsa stílnum þínum?

Ég er með mjög fjölbreyttan stíl og held mig aldrei við neina stefnu. Ég get verið í algjörri götutísku eða glerfín, bara eftir því hvernig skapi ég vakna og hvaða erindi ég á um daginn, stundum eins og hippi, skoppari eða fín frú. Ég nýt þess að vera bara alls konar eins og vindurinn blæs og passa í marga stíla.

Hefur stíllinn þinn breyst mikið í gegnum tíðina og hvernig þá?

Góð spurning, ég held bara ekki. Ég er enn að nota gömlu, góðu fötin mín og maður róterar þessu í allar áttir. En ég legg miklu meira upp úr að kaupa vandaðri föt í dag, kaupi mjög oft notuð föt og finn alltaf gersemar í Hringekjunni. 

Svo hef ég fengið mikið af fötum frá formæðrum mínum, móður sem er fatahönnuður og ömmum en þær voru miklar tískufyrirmyndir.

Hvaðan sækirðu innblástur í tískunni?

Ég skoða aldrei tískublöð og tek þetta bara úr umhverfinu, kvikmyndum, tónlist og menningunni. Svo eru vinkonur mínar svakalegar tískudrottningar og maður fær endalausan innblástur frá þeim.

Ertu með einhver boð og bönn þegar það kemur að klæðaburði?

Það er það skemmtilega við tískuna að það breytist í sífellu. Einn daginn eru það útvíðar buxur en niðurþröngar þann næsta. 

Ég man ég hugsaði hvað gekk fólki eiginlega til með þessa risa herðapúða á níunda áratugnum en nú finnst mér þetta mjög svalt. 

Það er alltaf slæm hugmynd að klæðast einhverju óþægilegu þannig það er algjört bann við því.

Hver er eftirminnilegasta flík sem þú hefur klæðst og af hverju?

Brúðarkjóllinn sem móðir mín gerði óaðfinnanlega þegar ég gifti mig fyrir 16 árum. Efnismikill og þungur með stórri slaufu aftan á og silfurskikkju við. Þvílíkur kjóll sem mér þykir mjög vænt um.

Býrðu yfir einhverju góðu ráði þegar það kemur að tísku?

Það er bara að þora. Ekki vera hrædd við að vera öðruvísi ef þér finnst eitthvað vera flott. Það er ekkert gaman ef allir eru eins.

Hér er hægt að fylgjast með Sóleyju á samfélagsmiðlinum Instagram.