Allt í gangi: Sumarfrí, skjálftar, spilling og .... vinna!

Hvernig á að vera hægt að fókusera á vinnuna þegar það er svona margt í gangi? Við að búa okkur undir sumarfrí, erum nánast í fullu starfi að fylgjast með veðurfréttum, þá bætist við enn eitt eldgosið sem er við það að hefjast og í ofanálag eru fréttir eins og af Íslandsbankamálinu og nú Lindahvolsmálinu fyrirferðarmiklar í fjölmiðlum.

Er nema von að það sé svolítið erfitt að halda fókus?

Það eru ýmiss góð ráð til að hjálpa okkur að halda einbeitingunni í vinnunni, þegar það er margt annað í gangi. Í grein Forbes um einmitt þessi mál, er mælt sérstaklega með sjálfsrækt og þá grein má lesa hér.

Oft snúast svona dagar fyrst og fremst um að við búum okkur til smá truflun fyrir okkar eigin huga. Gerum hlutina aðeins öðruvísi sem þýðir að í staðinn fyrir að hugurinn verði svona upptekinn af öllu sem er að gerast í kringum okkur, verður hann upptekinn af nýju leikreglunum sem við ætlum að fylgja eftir í nokkra daga, svona á meðan við erum að yfirstíga þessa tilfinningu að finnast við eiga erfitt með að einbeita okkur að öðru en því sem er í gangi.

Hér eru fjögur dæmi um hvað við getum gert.

1. Fjölmiðlar og samfélagsmiðlar

Hér er mælt með því að takmarka notkunina okkar á að fylgjast með samfélagsmiðlum og fjölmiðlum. Í raun getum við svo sem treyst á vinnufélagana ef það byrjar allt í einu að gjósa. 

Við bendum til dæmis á 25 mínútna aðferðina sem þýðir að við setjum okkur það sem markmið að kíkja ekki á símann okkar nema á 25 mínútna fresti, sjá lið nr.4.

2. Veldu eitthvað þrennt

Í staðinn fyrir hefðbundinn verkefnalista er ágætt að velja eitthvað þrennt. Því það sem er ólíkt þessa dagana miðað við flesta aðra vinnudaga er að það eru hlutir í kringum okkur sem eru að trufla sérstaklega og til að sporna við þeirri truflun, er ágætt að gera hlutina aðeins öðruvísi.

Veldu því eitthvað þrennt sem þú vilt eða þarft að klára í dag og byrjaðu á þeim lista. Þegar þú lýkur þeim lista, velur þú aftur eitthvað þrennt og síðan koll af kolli.

Þetta þurfa ekkert endilega að vera stór verkefni né tímafrek.

3. Gerðu eitthvað öðruvísi

Til að gera hugann upptekinn af öðru en því sem er að trufla okkur í umhverfinu, er líka ágætt að gera einhverja hluti aðeins öðruvísi en við erum vön.

Ef við til dæmis notum eitthvað kerfi til að halda utan um skipulagið okkar gætum við þessa dagana prófað að skrifa verkefnin frekar niður á blað. Eða að við færum okkur um sæti í vinnunni, sérstaklega auðvelt nú þegar margir vinnufélagar eru í fríi.

4. Einfalt 25 mínútna kerfi

Þessi aðferð felst í því að taka 25 mínútna lotur yfir daginn og síðan 5 mínútna pásur.

Í staðinn fyrir að vera til dæmis extra mikið á spjalli eða með eyrun opin fyrir spjalli vinnufélagana og fleira og vera sífellt að kíkja í símann, setjum við okkur markmið um að vera upptekin í þriggja atriða listanum okkar í 25 mínútur í senn.

Þegar þeim lýkur, fáum við 5 mínútna pásu sem gefur okkur smá andrými til að líta upp og taka kannski aðeins þátt í spjallinu, en síðan förum við aftur af stað í 25 mínútur.